Crisis in se ipsum Machine-readable text Jacob SJ Balde Balde, Jacob SJ XML version, markup prototype, December 1999 Ruediger Niehl markup Camena
http://www.uni-mannheim.de/mateo/camena/ bald7 baldecrisis.html s001.html baldecrisis.xml bald7/jpg html Muenchen: Wagner, 1661.

Regeln fuer die Texterfassung 03/2001

not necessary

 31 January 2004 Ruediger Niehl markup typed-structural tagging complete- semantic tagging complete- Morpheus spell-check FRAGMENTA SATYRAE CRISIS INSCRIPTAE.
ALPHONSO CARAVENDAE F. B. Sal. D.

Poema novi prorsus argumenti, novae compositionis offero tibi, optime Alphonse. In gratiam Affinis sui Pauli Sfondratae Frobenii confectum est, eiusdemque voluntate, ac voto tibi inscriptum; addita causa. Ex quo enim Frater eius Philippus Frobenius maior natu Sororem tuam Annam Caeciliam Lectissimam Virginem matrimonio sibi iunxit, scio vos amore, studiisque semper fuisse coniunctissimos. Simul mansuetioribus musis, ac severioribus operam dedistis, simul Italiam, Galliasque et Belgium peragrastis, totque amplissimis Provinciis utilitate vestra lustratis, instructa variis artibus ingenia, moresque cultissimos in patriam rettulistis. Cum Lyrica nostra; aliaque Poemata diverso tempore ederemus in lucem, nondum eius aetatis eras, cui aliquid dedicari posset. Patieris nunc saltem unum, ex vetusta clarissimaque Caravendarum Prosapia nomen, tuum videlicet, libellis meis inseri. Ceterum scriptioni huic causam ansamque praebuit ipse Affinis tuus Paulus Frobenius. Questum ad me venerat de improbis moribus Germaniae. Tantam obtrectandi licentiam in exteris Regionibus non observasse: calumniandi libidinem dominari, et saevire impune. Memorabat in exemplum, quae Fratri suo in ipsis nuptiis evenissent, quae sibi cotidie evenirent; lacerari famam, foedari nomina, passim volitare sarcasmos, deterrimis interpretibus omnia esse obnoxia. Quae vidisset apud cultas nationes, in ludibrium trahi. non formam calceorum, non pilei, non gladii: non ullius peregrini vestitus placere. Eruditis quoque laboribus, si quid moliretur, afflari fumum; figi aculeum. Atque haec dolentius. Fateor ad quaedam risum cohibere non potui; adversus aliqua conatus sum adhibere fomenta, qualia suggerebat extemporale ingenium. Temerariam garrulitatem, suggillandique pruritum non esse vitia noviter in Germaniam illata. Iam inde antiquitus laborare. Detorquere sermonem, extenuare facta, illudere quibuscumque personis iam saeculum vocari. Proinde obfirmaret animum, et vel silentio vel contemptu aspernanda transmitteret. Si dissimulare posset iniurias, inimicos fodicaturum calcaribus, quae ipsimet fabricassent. Dicteria recipientem uri; qui non uritur, non recepisse. Si stimulos aemulorum gloria, prosperique successus excitassent, his se soletur. An nesciret, attritum vomerem magis splendescere? agitatum contumeliis honorem sublimius incendi? Laudaret vituperantes. Nihil acerbius facturum. Carbones nimirum super inimicorum capita coacervandos, ut vel altius clament, vel muti dolore tabescant. haec atque huiusmodi plura, queritanti ingesseram. Ad extremum: quid vis Sfondrata? albae Gallinae filium Te reputas, nunquam denigrandum? Consuetudo humana non permittit. Omnes decoloramur. Populo non magis obstrues ora, quam ventri. Thomae Kempensis Oraculum expende: cotemnenda esse verba, quae per aerem volant, et lapidem non laedunt. Philosophus es? Lapis Philosophicus non vitiatur sordibus scoriae: sed contra ignobiliori metallo tincturam, fulgoremque auri aspergit. Poeta es? Heliconii lapides non laeduntur afflatu sycophantae, quamquam saepe allisas voces vindex echo in auctorem reverberet. Quod fieri posse festivi Poematis inventione demonstrabo. Ipsissimum hoc est, nobilissime Caravenda, tuo nomini inscriptum. In hoc frusta calumniantium in caput meum satyrice coniecta, forti repulsu in Criticos apologetice pleraque retorquentur. Plura spleni concitando serviunt. Carmen intercisum est, quippe mera fragmenta complexum. susurri enim et famigerationes non omnes recta linea perveniunt ad aurem. Obliquae, obtusae, obscurae, clarae, hiulcae, timidae, suspiciosae, qua vera, qua falsa spargunt. Ut ut sit, aut me multa confinxisse putabis, Alphonse, et saltem ex figmento capies voluptatem; aut alios vera de me dixisse credas, et cum reo fatente ridebis; interque tumultantium linguarum murmura mecum animosus imitator iocabere. Vale.

Ad Paulum Sfondratam Poema. I. NOn satis est culpasse alios: culpemur et ipsi, Ac quid de nobis dicatur, qua licet, et res Intercisa sinit, vacuas referamus ad aures. Diversos hominum mores, diversa Frobeni Iudicia, ac sensus, libertatemque loquendi Hic ad Danubium mecum mirare sub umbra Populea: tamen Alcides requievit eadem; Quid mihi contingat, tibi quod contingere possit, Si vacat, et pateris, paucis, adverte, docebo. Vivitur hoc pacto, facile est incurrere ronchum, Illotasque manus, posticae opprobria sannae. Conveniunt Momi tanquam mihi fixa sit hasta. Utque in bubonem magno clamore diurnum Exstimulantur aves, confertaque spicula tendunt; Obvius infestis sic obruor undique telis. Omnia sunt nugis, sunt omnia plena querelis. Pars ad me venit: partem dispersit in auras Ventus: eunt timidi plures, et dicere mussant. ------ hinc vacuum, crebraeque lacunae. Cantemus. Patronus adest; cum provocat actor. Ipsum non pallet bene conscius ad Rhadamantum. Censurae semper pene in contraria vergunt. Quod probat hic, damnant alii; quae damnat Acestes; Vindex Varro probat. Defendor, et arguor idem. II. Quod felix faustumque fuat, mihi quod bene vortat, Incipiam. Princeps igitur sic inchoat Astur: Nescio, quale chaos sit in isto corpore, frigus, An calor excellat? sanguisne, an phlegma redundet. Quatuor ex primis quis sit praetorius humor? Quisquis is est, certe non est innoxius humor. Tam varios fluit in gyros. huic tristior: illi Laetior apparet. quondam morosior isti. -------- Ignoras prorsus, sit Minotaurus, an hirco Miscuerit cervum natura, lupone columbam? Audiit hoc Mnesteus ridens: quid? si iste palumbus, Cur longum nasum praetendit vulturis unci Gingivam queritur (dubium) intellectus inermem: Et tamen absentes, praesentes tam male mordet. Nempe ideo subicit Boscas, quia non bene dentit. Tappus ait. si felle caret, cur surgit in enses? Cur scribit Satyras? si flavae bilis abundans Implicuit folles: cur saepius obstruit iram? Ac ne transfumet, placido componitur ore, Tam facilis, quam quos pituitae copia tentat? Non videas illum ringi Marsae suis instar, Aut uno cursu per devia quaeque Damascum Tendere, quo raptu fertur Paragellus Agilleus, Qui simul ac conscendit equum, pedes aequora campi Pervolat irarum spirans; tum verberat auras Calcibus, et tranat nubes, ceu Perseus olim Motu continuo. Nunquam respectat, iterque Conficit immensum. Quis credat, vespere nondum Exacto, est idem Manno rediturus eodem: Efflantem Pyroen flammas hic mannulus anteit. Nec se Bucephalus, Zephyri nec comparet ala. Noster testudo est. quam languidus indignatur. Quam tarde incedit! stadio lassatur in uno. Imo, ait Arnoldus, momento permeat orbem. --------- Est alter Proteus, ac paene Tigellius alter, Quo mirabilius, Flacco testante fuit nil. O Abderitae! rumpit suspiria voce, Sergestus, si prima latet vos linea vultus, Abdita qui mentis dignoscere sensa potestis: Conciliumque animae secreta in parte negantis Ire sub aspectum, vel prodere, quae coquit intus. III. Contendebat Agir, nascenti sidere faustum Fulsisse, et radiis Genesin lustrasse beatam. Hinc geniale iubar, gracilisque Agathyrsus, et expers Turpis aqualiculi, vernansque in corpore sanguis. Et sita laetitiae sacris in vallibus ora Hinc et amor doctae testudinis, atque Thaliae, Conchaque pura salis, felixque Annona Iocorum. Vix haec, cum Pitrox audax: Horoscopus, erras, Adversis natum fatis, avibusque sinistris Proclamat, dicitque palam: non sidera faustum, Fulsisse, et genesin cunis iacuisse malignam Scorpius, inclemens Astrum, quod brachia curvat. Extremae natum perstrinxit acumine caudae. Cum Mars Saturno falcem infregisset acutam, Mercurii langueret apex, talaria plantis Deciderent, geminique angues, interprete virga. Hinc furor exsultans, animique poetica moti Tempestas, et amor Satyrarum, atrique veneni. IV. Milvus adest, Crispusque suo cognomine dignus, Acriter exorsi, atque procaciter: hic homo nunquam Non mihi displicuit, tam crudis moribus et tam Enormis Cyclops. tam rancidus, inque-ficetus. Praetereo sordes, nimium quas praeterit ipse. Nam matutino quoties se flumine lustrat? Non est munditiae, Venetae non cura saponis; Impexum, illotum, incultum, quae Gratia amaret? ---- nec Erynnis opinor. Stoicus et Cynicus spectrum miscentur in unum. Vix a Cardani vita discernere possis. Scilicet ut squalent extra, sic omnia et intra. Forsitan, iniecit, quo non sollertior alter, Bagophanes Sciolus, curis maioribus actus, Negligit inferiora sui. Laudabile, corpus Non nimis excolere, et turpe est ad pascua vatem Proiectum, thermis, formae, pecudique vacare. V. Sed cur erigitur rigidi pilus instar echini, Cum tamen Euganeae lana sit mollior agnae? (Huc quoque processit censendi dira libido!) Erectos etiam, mollesque, insane capillos; Obicis? at tales, si quidquam credis, Athenis, Ille sophus laudat, qui discurrebat eundo. Plura cupis? Vertex tantae sacer arboris, annos, Intra ter denos rastrum non sensit eburnum. Sed neque pungentis cephaleae spicula sensit; Non sensit laesi metuenda Ceraunia nervi. ---------- VI. Instat Aretinus pronepos Samuelis Amolli, Tuscus avo: patre Germano: prope flumen Anassum Progenitus vendente piper. ----- Ille quid? Invisum Superis hoc censeo frustum Qualiscumque hominis. Cui non fastidia visus, Ingerit? horrorem creat, occiditque videndo. Iam cupit, et torvus, taurina fronte videri. Atque (utinam voti media plus parte beetur!) Conscripsit librum, deformavitque venustos: Absurdis gaudet: modo dissona et absona promas. Applaudet. -- Liceat modo vivere -- Loripedem recto praeponet, et Aethiopem albo; Indoctum Baracen callenti Iura Rebuffo. Expecto donec declinet prodigus Istrum In caput, et contra fluvium natet ... Iam speculi lucem, iam dentes pectinis odit Haud equidem nivei barri, sed dentibus apri Dignior, aut quantos tenero lupus imprimit agno. Quando ita vult, sit deformis, maneatque per aevum, ----- subscribimus ultro. Illo vix Briareus formosior ----- --- Polyphemum, et Alastora vincat. Invideat pulchris, rugasque ostendat aniles. Sed num servabit leges. quas sanxit ineptas? Quis scit, an in speculo sua non consideret ora. Aut fontem inspectet; nisi forte horrore Medusae, Quae sedet in medio, fugiat cognoscere vultum. Cur non in silvas sese et stabula alta ferarum Abdit? ibi fratres torvos, torvosque sodales Inveniet, Regis Chaldaei facta secutus. Torva boum facies, Gaetuli torva Leonis. Torva est ursorum, torvo sunt ore bisontes. Et bene cornuto cognatus bubalus uro. Bistonas, Odrysiosque adeat Rhodopenque nivalem, Torva reperturus populi portenta ferocis. VII. Incessus qualis? quo vespertina Colossi Umbra cadens, graditur passu! iam qualis amictus? Nil decet hanc statuam. Circumda, quidquid ubique est Aebaliae, Tyriaeque togae, variaque figuram; ---- muta quadrata rotundis. Vestitus quadratus erit: quadratus et ipse est. Nil decet. a tergo, seu mantica pendeat ante, Pertica velatur oblonga, vel aeneus Hermes. O Davi! Pterelas, Pterelas, ita farier infit. Tantane dos habitus? monstrari in Cyclade longa, Verrentem terras, ac mollia colla gerentem, Femineum A primae. Racostas -- novit Grammaticus: puerile decus, puerilis imago Sunt puerum ludus, puerilia gaudia rallae. Scimus, quid crocet textum velanten achanti, --- Ilione quod gesserat olim, Maxima Gnatarum Priami, colloque monile Bacchatum. -------- Ornatus Argivae Helenae? sic femina compta Incedat. Vates non nescit: splendidiorem Quod, quicumque virum splendenti in veste puter se; Finxerit hunc olim celeberrimus ille Maronis Sulphurea Nar albus aqua, quo Teutida prolem Plurima nunc Matrona lavat. Mos desiit ille Ut Rheno (quid non minuit vitiosa vetustas?) Iam vino infantes genus explorante lavantur. VIII. Eloquar an sileam? tantem gratare Frobeni, Sedulitate probor. ------ Saltem aliquid -- laudis inest ---- ---- densa me indagine rerum Obsaeptum commendat Hylax: modicumque sopori, Noctes, atque dies studiis impendere, credit. Nec male: nam quaesitus ait si - - -- Quis dubitet? -- est totus in illis. Heu nihil invitis fas quemquam fidere Divis Haec quoque decutitur mihi laus. Contrarius Umber (Sed doctos inter qui rectius umbra vocetur) Nil prorsus dixisti. Quanta est ignavia fuci? In terris umquam frugi fuit Alsata visus? Novi hominem; noctem musis non consecrat unam; Ut scabat ille caput, digitos arrodat et ungueis! Iudaei credant, etiam loti atque togati ---------- Dum quatit attonitam mentem phanaticus ardor Multa cadent inter lupulos, supremaque labra. Vitibus a madidis pendet. Cum vanuit humor, Tunc choreae mentis cessant, Gluckersius inquit: Nec pedibus motis ad cantum carmina saltant. Argumentum Umber conductis follibus urget. Nam quando auroram vigilat praevertere? quando Affixus pluteo; sicut pallentibus undis Actius, et frater Corybas? Sata, iugera, villas, Prataque prospectu fixo metitur, et arva, Dispersasque domos, --- praeterque fluentem, Nec procul hinc falsam, cervorum pascua cretam. -------- Ac ne visa procul fallant confusa remotum, Concava convexo sociat Crystallina vitro, Exacuitque oculos, et languida lumina torno Roborat, anticipans longinquos mille colores, Observare vates, venientum discere vultus, Officii pars est, puto non postrema diurni. Praefectum credas ad vectigalia naulo Desuper excubias agere, et dare classica velle. Pars quota curarum sellae datur, atque labori Palladio? aut quoties visus cum --- --- (O dira calumnia, quantum In nos iuris habes!) ----- ---- nisi forte Lybistidis instar Alitis obtutu sua solo excluserit ova. Cunctane per somnum didicit, vel discit inertem? Otie quo titulo manifesta negotia fiunt? Cum res ipsa manum poscis, nil manca voluntas Prodest. exsertis peraguntur bella lacertis. Aiacis gladius quo? si vagina recondit? Rubigo ingenium non tantum perdidit unum. --------- IX. Sermonem abrupit Maruli iucunda senectus Is causam nostram patroni more profunda Strenuus ex animi radice medullitus egit. Dormiat, an vigilet, quem tu traducis acerbe. Algeat, an sudet; spatietur, an ille quiescat? Sub schino, an Prino soleat latitare, quid ad me? Nescio; nec nostrum est alienas cedere vites. Quid faciat Corydon, exploret lictor Amyntas. Hoc scio, cum summis in turribus ambulat index. Circuituque suo labentia tempora signat, Non tardare rotas, nec stare, sed usque moveri. Quo tendam, ipse queas, si vis, deprendere verum. Quid quid Anaxagoras prisco garriverit aevo, Haud temere, vel fortuito casa rustica surgit. Nedum Pyramidum moles, laqueataque tecta. Ergo spectanti monumenta, industria certa est. Plurima iam praelo subiecit olentia cedrum, Nocturnasque faces, et sucum mitis olivae. Successusque probant operam: ni temporis esset Parcus, et admensas se partiretur in horas, Nunquam aspexissent lucem Iunone secunda --------- Sed manica excussit? cur tu non excutis aeque? Qui tantum lauri tibi consumpsisse videris, Quantum sufficiat centum ad ientacula capris? Hoc habet! I verbis virtutem illude superbis. Mente profanata turbatus inhorruit Umber, Non aliter, quam qui de fonte Silesius hausit Schepsiaco * laticem cerebro tenus aestuat amens. Corrugat frontem mirabilis intus in* hirnis. Perrexit Marulus tamen, et sic institit ore. Naviget, aut equitet, Vates hic ubique laborat. Secum qui gestat Parnassum in vertice vivum. Non sella, non ille loco, non limite circum- Scribitur; ad stivam, pharetram, remosque, tubasque, Et cyathos: media cantare licebit in urbe. X. Parte alia nova lis oritur: tonat altera nubes. Equid in his nugis totam consumere vitam? Desine, ait Cucuphas, iam tandem, Aprinasque relinque, Fabellasque tuas, Acheloon, Adonin et Acin Egeriamque, et Leucotheen, Semelenque, iugali Igne fere exustam, Dryopenque sub arbore versam Arboris in ramos, cumque Alpheo Arethusam Quid iuvat Alpheae meminisse, Galanthidis ore, Andromedae captae? quid Cepheos et Meleagri? Salmacis, Ocyroe, Melicertes? Cyllarus, Iphis Nomina vana sonant, et sunt sine pondere verba. Sat Phoebo, musisque datum, Clivoque bicorni: Fama, quae parta est, potes hinc contentus abire. Iamque undena premunt lustra incurvantia dorsum. Non sentis annos? tibi iam vicina senectus Imminet, et scapulas pulsat vespillo Diaulus. Si nondum omnino viridis deferbuit aestus, Utilius cathedras magno, et lato ore ferires; Intentus crotalis sacra, et divina relinques. Aude aliquid: bene coepta etiam, quaecumque ea, merge Danubio; vehet hic vitulis donanda marinis XI. Ne faxis, inquit Capito, Capitonis Osannae Filius, ex Rheno nostras transmissus in oras; Deliciasne tuas Cirrham, Cytheramque remittes? Sed neque diversis studiis tot sufficis unus. Pectora nostra avas non accipientia curas; Olim aliquis monuit, qui te commonitum vult. Nec durant violenta diu: quod cogitur, haeret, Hoc ipso, ut navis sine ventis, et sine remis. Debilis inviti vigor, et natura labascit, Et torpent animis, seque ad meliora reservant. Adiice, quod graciles, et longi, quando canoram Tendere coguntur vocem, crebroque caducum Exercere latus, lassentur, et ilia ducant. Laeditur et pulmo, donec titubata fatiscat Machina, et extremam facies fluat omnis in umbram. Noli fata tibi totiens contraria flecti, Lanificamque Deam expertam superare precando. Aut anima exibit cum sputo sanguinis atri. Evasisse sat est iam bis ---- Qui studia Aonidum atrodunt, dictisque lacessunt, Ceu divina minus (quae se ipsam fama refutat.) Atque adeo non digna viris caelestibus: illos Mitte in Narboniam, primosque invade, Lupi ceu, Quos atra in nebula rabies exegit edendi. Hi Satyram, Entelli caestus et lora merentur, Insuto plumbo. Quid sancta superbia dicis? Stulta, inquam, magno flatu disrumpere! vana Omnia sunt vanis: sacris sunt omnia sacra. XII. Quem numerum augebis, si pergas dicere: dixi. Buschius addiderat Visurgi notus et Oeno; Quid prodest tandem magni Demosthenis EI)/PA Excrevit lato praeconum copia cornu, Qui sine sine tonent. nec stentor Homericus umquam Defuerit, solidas rumpens clamore columnas. Pulpitaque innumera manuum vibice cruentans. Ingens picarum grex est hinc inde volantum. ----- rostris plena omnia rostra. Haud itidem Divum sunt tanta examina vatum. Haud itidem? occurrunt Calecutius, et Polipercon? Cuncta Poetarum segmentis atria squalent. --- totus tamen orbis abundat His cannis. passim inflantur. Dic in quibus agris Urbibus, aut pagis, cauponarumque tabernis Non istae, quamvis steriles, dominentur arenae? Buschius excepit: steriles? concedimus ultro; Fecundae sed ubi? facundae, aptaeque, volebam Dicere. Pegasidum studiis et Apollinis ori Non quivis Mopsus patulae sub tegmine fagi Sylvestrem tenui musam meditatur avena, Quanto bella minus! nam tunc opus arma sonare, Aere ciere viros, Martemque accendere cantu. Audacter sane Vates tu mille recenses; Omnibus excussis, totidem vix invenies, quot Arca antiqua tulit centum fabricata per annos, In summa fluitaret aqua cum naufragus orbis. Occursant multi baccas cum fronde ferentes, Arida stramineae meriti ramenta coronae. Sic crescit numerus. Sic una nocte trecenti Attollunt fungi capita, et moriuntur eadem. XIII. Post hos arrepta est Blanco data copia fandi: Hoc odi, sibi quod cerebrosus serviat uni; Quippe sui capitis: propria dominatur in arce. Impatiens aliena sequi ---- - ab invito quando extorquebis Iambum? Hoc, aliudve petes, digitos quasi pectine iunget. Crispabit nasum, dubitantia contrahet. ora, Praetendet causas, et frons erit unca ruga. Nitimur in vetitum. Mandes quodcumque poema, Protinus historiam scribet. Conscribere iustus Temporis acta sui, fastos implebit inanes. Nil adeo varium magis, ac mirabile vidi. Sic est. infixum Venusini haerebit, et haeret Omnibus hoc vitium cantoribus: Inter amicos Ut nunquam inducant animum cantare rogati; Iniussi nunquam de sistant --- Olli Hoc vitio quo que maius inest. maria ima subibit, Si terram monstres. missum super aequora, portu Insula suscipiet. Cretae pertaesus, et alas Sumet, et ignotas animum dimittet in oras, Naturamque novans, disponet in ordine pennas, A minima coeptas, longam breviore sequente, Ut Clivo crivisse putes; dicetque volando: Omnia possideat, non possidet omnia Minos. Sume novum specimen: quibus exagitatus echinis, Qua furia linguam fundo tenus eruit Oscam? Heu quanto satius stygia tellure repostam? Serpentes medios audita vocabula rumpant, Tisiphoneque tuos, sinon avertere tentes. Vocibus heu nostras incestis polluit aures. Olli sedato respondit corde Latinus, Non minus ille potens Euandria dicere verba. Frustra obstringillas raude, et sine Apolline, Blance. An non Casmenas tapperque, atque ampliter Oscas Ruspatus dedit in lucem, Axamenta Cnephosa, Mangante veterum de fonte anclans hilarodes, Sitilet ut vulgus: contempla, quanta labose Gnariget artitus: quae clutriet, atque returdet Hautmenta, et fallas, quippe et popularia nexens Faminat, obscuros, qui adrumans expatat orbi Pacuvios: cossisque catus det alebria musis. Clivia sunt, fateor, sed matrescentia linguae Semina Romanae, quum nasceret: illaque taxim Tempestoque modo urvarunt pulchraliter Urbem. His me defraudes, et aventeis plissima nosse? Tunc primum Caperon animum haec in verba resolvit: Utilis ingeniis libertas, laetaque cursu Provehit, et faciles laxat, non stringit habenas. Sunt quidam vili vel natio sorte, vel illa Damnati: quod nil nisi vincula, flagra, triremes, Numellasque crepent; Aliis nec legibus artes Ingenuas tractant. Lictoris filius Harsa Cuncta ad dimensum Plauti servile reposcet; Nam sic assuevit dimensus partibus octo. XIV. Mancipia oderunt musae, servosque revinctos, Et iuga dura boum -- asinique capistrum. Non nisi equum Parnassus habet, quem penna gubernat Expertem fraeni. Labore est inhibere volantem. An non dedecorum passim ludibria prostant? An non se cruciant; animumque, operamque Faliscus Perdidit, et lacrimas? --- quanta voluptas Regis in obsequium clittellas ferre rubentes! Invitum calidam Thalamis suspendere Myrthum! Infantis Clario vagitum sistere sistro! Parvis Ascaniis puerilem appendere bullam! Paupertas peiora iubet, studiumque placendi. Exanimatus erit Tiphys, vel avarus Iason, Aut quisquis demum -- vexare iubetur Ridentes oculos Italis humoribus, utque Praefica venalis nummum explorare triente. Carminibus paries fusis quacumque palude Maeret, et admixti coguntur flere colores, Tunc Helicon clarus, tunc sunt in honore Poetae; Crastina cerussam mox spongia diluet omnem, Abstergetque decus. ------ Exanimes ipsi fiunt nova funera, versus; Et quem planxerunt, tumulo sternuntur eodem. ---------- XV. Successit Baleron, nec convenientia semper Suadentur scribenda: locus, tempusque, modusque Deficiunt -------- -- quaedam siles prudentius: aevo, Cum fax in cinerem sedit. permissa sequenti ------- omnia dici Non patitur livor, non formidabile Verum: Nam quidquid dicas, terrent exempla priorum. -- non sunt blanda omnia tanti. Armataeque preces, sperataque bractea famae, Ut pergas versare molam, quam desuper urget Glatta, molam versare piger, tritaeque papyri Servandos nigris modios immittere saccis, Sicut nempe solet defundi ex ore farina Tutelam in castri, saeclis servanda duobus: --- non festinamus honoris Qui post fata venit. Sollers et Ianus utrinque Consumi vano refugit, stultoque labore, Cautior ambiguo praesens praeferre futuro. Nimirum chartae felices, atque tabellae, Quas tineae rodunt, cistae, forulique recludunt! ---------- Scilicet ut lector verso te pollice damnet, Prostituas fessi scribendo pollicis unguem. Est aliquid lintrem non omni credere vento: Sic calamum libris: nulla heic aenigmata texo. Qui nares habet, olfaciat. non sicut reor, omnes Vervecum in patria, crassoque sub aere nati. Multa quidem -- dicuntur ---- Assensum praestare piget. ----- ------- sic credere cogas Credam, sed timide. ------ --- non est dementia maior Quam fuere incassum: furit autem quisque arenam Horridaque adverso proscindens vomere tesqua Ex tribulis sperat ficus, ex sentibus uvas. Frigida quid possunt super haec promissa, nucesque Verborum cassae? fiet, si navis Athenas Venerit. Expectes hac conditione peracta. Te fore nummatum! fiet li gemmea grando Deciderit, riguique pluet torrentibus auri. Addidit Albinus prisci candoris amicus: Vitae summa brevis certam nos figere metam Conspicuamque movet. Longe distantia raro Tangimus: adversis iaculum impedientibus austris, Inter - enim - veniunt casus, mortisque sagittae, Propositumque volans sistit Letalis arundo. XVI. Talibus alternant studiis et amicus, et hostis; Sum scopus illorum, quorum os, et cor pharetratum est. Sed tamen Herciscis placeo, dulcique Molardo. Candidus affirmor, nec non sincerus, aperti Pectoris, a puero multum qui lactis ovini Suxerit: aurai pellucens simplicis igni. Contra Acer: vappa est, et habet sub pectore vulpem. Non ovis est, at avis, quam Regibus editus ille Horace ode 1.1.1Maecenas Atavistamen haud edat. Oedipe solve Hunc gryphum, nam tunc conviva mereberis esse. Maecenas centum cenanti apponet alaudas. -------- O! at avis! cui nec similem Stymphalus alebat, Nec vidit Phineus: vix par fuit illa Celaeno. Hic mihi sincerus, simplex! hic Candidus ater! Candet parte tenus: partem color occupat ille, Quem ferrugineum fornax Hecateia fundit. Esto aliquando foras suspecta eliminet, aut se Rimosum simulet: quae vult secreta latere, Non vino poteris, non extorquere culullis, Sed neque vi magica, neque blanditiisque, minisque: Non fastiditi si vasta volumina Molvae Insulsosque iocos, et scripta legenda mineris. Apricus non est, qui promit inania verba. Seria custodit sexcentis abdita claustris. XVII. Surrexit Gliscus multo spectatus ab usu: Turpe, reor, mentem humanam, venalia ut exta, In patulo prostare foro. Traluceat Ancus, Ut volet, et nudet costas; prudentia caute Plus loquitur quandoque silens. superare tacendo Latratus sapiens, non irritare caninos, Sed sopire solet. Nolebat semper apertam Pythagorae senis esse domum bonus incola. Magni Ostii firma sera est: Digito compesce labella. Nempe animus consul soli constare sibi vult. ------------ XVIII. Ast aliud monstrum; quid dicat Aruntius, audi. Huius dum nuper non cognitus ante, subirem Conspectum, minuit tenuis praesentia Vatem. Splendida narranti nullus respondeo famae; Maiorem fingunt simulacra impressa: minorem Deterior species mira exspectantibus offert; Procerum, tristem, tetricum, similem que Severo Sulpicio, qui non nisi bis ter risit in anno. Accedit sermonis acor, non semper ad aures Mellitas factus, lambendaque sesama linguae: Quid? quod in agresti vultu ferus emicet Afer? Quid? quod ad incudem, quam principis aptior aulam! Quid? quod inurbanus quon dam et subrusticus hospes? Ac nisi libertas hilaris sponte ora relaxet, Conviva Harpocrates; igitur mirantur, et aiunt, Hic ille Amphion! hic est Alemannicus Orpheus! Nil supra vulgum facie resplendet in ista. XIX. Contra alii, quos inter Heges, Gutpertius, Haymon, Huppius, et frustra non Famigusta vocatus, Ursinusque Ligur, fabroque nagelius ortus, Intuitu primo quoque me, ceu sacra ferentem Isidis, aut Cybeles mixto terrore verentur, Haerentemque notant circa praecordia Phoebum, Nec credunt omni positas sine numine rugas. Quandoquidem veteres referam rubigine vultus. Quales Roma tulit primis subiecta Tyrannis, Tempore quo rexit Latias Augustus habenas. --------- XX. Addunt Stemisius: nec ei Marpesius impar Helveta: quem mutum piscem vos creditis esse, Si semel amovit Sigei vincula fraeni Inceptique loqui, non fusis aestuat albis. Ecce novem pandet mugitibus ora Timavus. Impatiens ripae lingua est; Torrente rotatur. Ilia quin etiam risu concussa protervo, Et latera aspicias alterno verbere tundi. Tantum splenis habet; sed haberet plus lacrimarum! Quod plures optant: quidam cinerem --- Atque salem inspergunt oculis ---- --- qualis lixivia! ---- Sanctius, utiliusque foret. ---- O lacrimae dulces, sacro Iordane petitae! Haec aqua foetentes animas lavat: huius in amne Totus mergendus foret, Istud quippe Menoetes Exoptat, claudusque Gyas, caecusque Cloanthus, Et Sagaris. Sic me socii defenditis? ohe! XXI. Interea magno Forestius occipit ore. Hic idem Momis invisus, quidquid agatur, Mite trahit senium: sed quod sperare timebam, Caesaries nullis albescit tempora circum Indiciis. Quodsi Cygnis foret iste Poeta Carus, olorinas gestaret vertice plumas. Si credo auguriis, corvorum ex gente videtur Esse (vel ex alto Corvini sanguine) vivat! Suspecto fraudem. fugiens intercipit aevum Et pudet esse senem propiorem abeuntibus annis. Unguentis multi properos inducere canos, Naturam violante dolo, creduntur; hic arcet Contra omnem morem -- quomodo? nullis Utitur inventis, nullo ceromate. Battus, Et Daxus iuvenes tinxerunt arte capillos. Flavus heri, niveus nunc est ex unguine Daxus. Unde autem vires? ------ --- aut qualiter Aesonis olim Sic huius macri tenues reparaverit annos Graminibus Medea suis: aut nescio, quid sit. Creditur herbarum peregrinis stirpibus uti, Vulgus ait (vulgus fingit) sunt germina Cafris, Sunt Afris, sunt mille nuces Regionibus illis, Quas Batavae visêre rates (sunt poma Draconis Hesperidum in nemore Aereo) bona Coccola radix A Brasilis veniens, Romanis nota Togatis, Qua Solis pascuntur equi, Lunaeque iuvenci; Exemptusque lapis Capreae, quam Persia nutrit. Erratis Flocomas, inquit, erratis amici: Prima Ceres unco terram dimovit aratro, Prima dedit fruges, alimentaque mitia terris, Prima dedit leges. Cereris sunt omnia munus. XXII. O utinam ante decem medius crepuisset aristas! Fregissetque suam curvato pondere spicam, Ipse quoque incumbens falci matura metenti; Tunc maturus erat: tunc nullus hypocrita tristes Fingebat vultus, vivumque vidensque cadaver. Conclamatus (abi!) plenus nidore sepulchri. Iam capulare tremens tantum non proximus umbris. Diris devoveo Medicum, qui reddidit orbi. Quos ego! sed motos praestat componere fluctus. Sta Ponsaldus ait, tu mortem optare Poetae? Paene tuum infelix nomen! sed prodere parco. Tu medico diras? cuius vel nomine in ipse Usque fides ludunt (Geigerii in nomine *) Tantis laetitiis vir servato capite isto Incessit, reliquo iam desperante senatu. Ut video, malles animam servare catellae, Quam vatis: dignus celebris cui victima fias. Debebas illum potius sub cespite putrem Eruere ad superos, et amicis reddere musis. Sed vivat, valetque precor! vivitque, valetque. (Omnino: nec amet quemquam, nec ametur ab ullo.) Omnes hoc una mecum, puto, voce precantur. (Ut male sit cuncti iurata voce precamur.) Quae donat Lachesis: concessa relinquite fila (Imprecor, haec tanquam nevisset aranea, rumpi) Qui secus optarit, praecordia et ilia rumpat. XXIII. Atque his digressis Paperon sic farer infit: Nescio Aristippo sit sanctior, an Epicuro? Qui tamen, ut notum, ----- Nec macer est, ut ait. Semperne illudere nobis, Principibusque viris? ---- larvam Exesumque canem specie mentitur inani Ingentes humeros, quantos Titius - per Iugera --- immaniaque insuper ossa Non nuda obvelat pellis. fallacis Omasi Prominet Umbo capax, et opaci tympana ventris Tendit adeps: solo latrant ieiunia vultu; Cetera pars grunnit mutato Elpenore maior. XXIV. At non in sensum Mola conspiravit eundem. Nil vate hoc vidi frugalius. Ingemit escis, Et dolet accumbens; quadrantem ---- ---- ulli servire saginae ----- saepius extra Se rapitur, nostrique fori contagia spernit, Absorptus maiore gula. Divina videtur Posse pati.: divina loqui: divina capessit. Haec sapiunt. Contra Salaphras: rapiatur an extra Se, nondum constat: sed adhuc sub iudice lis est. Intra se rapiat quod plurima, nemo negabit. Nec plures tauros absumpsit Cacus abactos. Quantus in aggestas patinas! --- Hinc cacostomachus: sed non de nomine Graio. XXV. Longe aliam de me Grindmissius, atque Gerardus Idomeneus; equidem pallens edisse videtur, Ceu glandes: ac li caelestia pabula carpat, Alteriusque dapes ignotas ruminet orbis, Pertaesus nostri: Pertaesus scilicet, inquit Muftius: a nulla dape, quod mireris, abhorret. Cauta tamen certos, quaedam violare recusant Ora cibos. Alios terrebit aranea ponti, Grossus, adeps, atomus, cancer clipeatus, ab Indo Flumine testudo, Limax. hic omnia glutit; Carius est illi quod rarius: ostrea, grylli, Polypus, anguillae, lumbrici, monstra marina Sed maris Ionii: nam cetera --- Ranarumque pedes. Non felibus abstineat, si Hispanos inter versetur. Lutra, feraeque Amphibiae sapiunt: et forsitan ex crocodilo Ultima pars caudae (nil est pretiosius illa, Ut perhibent, sapidas qui gustavere lacertas.) Et nihilum ex Nilo ---- Laudamus macros, et pinguibus utimur annis. Salve Euan! ----- Strigosae pecudi porcus praefertur obesus. Pisa, fabas loquitur: sed Bacchanalia mandit. Iuxta illum, si vis, bene facta tomacula pone, Aut pernam, aut volucrem Numidam, Gallumque spadone --------- Quo longos digitos curvosque sit extensurus, In quae fercla vide. rapiet, quod molle renidet, Quod sapit, et nutrit. Lautaque proboscide surdum Callosumque etiam queat irritare palatum Heu qualis facies, et quali digna tabella! Quae tot dissimulat strages, et damna macelli --------- Devorat interdum frendens, quantum tribus ursis Sufficeret. paucis sat multa: absumeret ipsos Triptolemi currus, omnesque Evisichtonis ollas; --- dubito, peiorne Vitellus -- Adque sibi sacram coquus Heliogabalus aram. XXVI. Denique, quid verbis multis opus, aspice vitrum, Quot nodos habuit conflatae munus arenae: Nec Meliboeus habet plures thorace ligatos. Sed neque Berkemi maiores Alphesiboeus. Nec non a planta pedis et coxendice, adusque Nodosus collum noster Raumontius ---- --- capiti quoque Gordius haeret, - vix maior fuerit scyphus Herculis olim, Aut Bitiae, madidique Pholi ---- Captivas hoc haurit aquas, coctaeque lacunam Infundit Cereris: spumam iuvat usque ruentem Cernere, quos saltus det in aere, turbine quanto Gyrum triticeae resonans trahat Iridis humor (Iridis ah novus hic quis Statius?) et restagnet Tam vasto spatiosa cavo; vix antlia distat Nautica Belgarum. qualis sentina levatur, Aspice diducti quantus patet oris hiatus? Faucibus aequari Ballaenae credere possis. Dolia quot talis non evacuaverit Hydrus? Intret in Oceanum: certet cum piscibus illis, Qui choreas agitant pluviae praenuntia signa, Vertendique maris, ventis ad bella paratis. XXVII. --- at quando serius umquam est? Ut iurare queas te conspexisse Catonem? Hic animis opus Aenea. processit Achates Austrius in medium, violentaque dicta retorsit. Audi! non ipsi vita est imitanda Catonis Proposita, aut Scauri. sed quando serius umquam? Quando autem non est? etiam dum ludicra tactat, Serius est. animo forti quoscumque labores Aggreditur; quos nempe probat. Dic obsecro, quando Serius? ut mecum reputo, vim nominis huius Non bene perspectam, pondusque videris habere. Serius, inquiro, num sit? non quaestio vana est. Exagitavit enim paetum, fumumque tabacci Nuper, et explosit tanquam illaetabile virus, Hippomanesque foret, Lethaei gurgitis haustus. Tune odio vero credas, an pectore ficto Expressum in scena Mimum? quis credat amanti? Basta reponebat: modicum non sustulit usum, Si recte memini, tantum damnavit abusum. An non adversum congestis nubibus ingens Detonat, et valido assurgens movet arma lacerto! Serius at quando? quando non serius? ipsa Proelia ranarum eum muribus aspera, dicas. Seria, et arcanis penitus stipata tremendis. Tu fortasse novum cantes Agamemnona; cantes Aeacidem: pappus mediis mansurus in undis. Nascitur e tenui quoque Martis adorea culmo. ---- sed quando serius umquam? Quaeritur an sapias umquam bone Lentule. quando, Serius est? semper. quando ergo est serius? olim; Entheus horrorem cum toto corpore spirat Fatidicus, tragicoque evincit crura cothurno. Serius hic umquam? quando tu serius esse Incipies? tunc est, cum montis in ardua nisus, Et satur a fundo turbatae Aganippidis haustu Empedocles Sophoclesque vomit: volscique Poetae Relliquias, rapidique eructat carminis aestum. Serius? insanis. hoc testor serius. an sit Magni opus ingenii, fastu corrumpere vultum? Non omnes rugae sunt gratae. quaedam odiosa est. Taediaque invertit gravitas squalore superbo. Serius hic Vates est, an tantummodo torvus? Quem tu Timonem, Brutumque requiris ab illo, Qui mansuetarum colit otia blanda Dearum? Torvus et austerus non uno stipite pendent. Cum torvo bellus non convenit; at bene laetus, Insons, et posito calamo, quandoque remissus, Nulla supercilii laus est, pluteique tonantis. XXVIII. Ultima tentantur. Iam formidabilis Aiax Surgit, et est saltem, qui sic defenditur, inquit, Vanus adulator, palpumque obtrudere doctus; Mollia sub Latia praeconia vendidit hasta; Cum generosus adhuc vitales carperet auras, Memmius, et blandum Gallus submitteret aurum, Tunc Silvae, tunc antra loqui, tunc vivere fontes, Tunc iterare lyram, nervisque ad metra reductis Plaudere Francigenae, nomen que ad sidera ferre. --------- Illectus pretio census ad barbita sumpsit; Imbutaeque manus cordas tetigere sonantes. Claudius immensam Regni revocatus ad urbem Vix subiit fossam, nullum meus Alsata signum Edidit, et tacitus pressit post funera laudes. Ullane marmoreo data sunt Epicedia cippo? Ullane sacratos deflevit nenia manes? Ullane cum fuscis iniecta est floribus oda? Hic se non tenuit Franciscus Gambara, natus Dilingae, genitore Italo, genitrice Sueva: Falsum est, exclamat, contraque obnititur Ingens: Ignotum tentare virum non prava cupido, Venalesque fides, nec nominis ambitus egit; Ut caneret, movit virtus, persuavit amicus, Nec semel aut iterum: sed adurgens plus vice sexta Hortator, precibusque monens, et iurgia miscens Adiunctis sociis: ut ebur vocale resumptum Incuteret, sumptisque comis de virgine lauro Tam bene de musis meritum caput exornaret. At silet extinctum: pressitque in funere laudes. Nulla quidem saxis incisae signa querelae Invenio. quid tum? non omnis maeror ad ictum Lysippi scalpro utentis lapidescere debet. Scripta erat in saevam trabeata Philippica mortem. Delecta est: visumque fuit, minus esse dolendum. Vivit adhuc, qui sic vixit: non mortuus ille est, Sed cessit, corpusque animus mortale reliquit, Mutavitque locum; legatis ut sacer est mos. Quid faceret, cuius tu ingrata silentia cussas? Noluit atratus plebeium intendere lessum Irasci Parcis, Libitinam tundere versu; Haec lyra communis: flentis flendique Poetae. Mitius ingemuit: nec egebat nobilis Umbra Lamentis: virtus, ivit quocumque, secuta est. Ne dare verba putes, quaedam fragmenta supersunt. XXIX. En recito: verus Memii mihi nuntius ergo Venerat, extinctum, fatoque extrema secutum? Qui licet immeritum, quamvis regione remotum, Et nunquam visum me sic complexus amabas, Ut pia litares aegro soteria vati, Nunc tamen ante iaces, nobisque trahentibus auras. Cetera vide in Tomo III. heroicorum. fol. 259. XXX. Hactenus Arcesilas (namque hanc obiecerat hastam) Laudibus auditis his exequialibus, amens Confusus tergum vertit: quia cuspide fracta Viderat errorem: vultus Mamurtius auxit, Exclamavit enim non indignante corona: Quid refert tales versus qua voce legantur. Armenus Hercynio Paperoni notus Ulysses Obstupuit, crebroque pedem cum voce repressit, Ceu qui improvisum ----- --------- XXXI. Iam serus Vesper longas extenderat umbras, Et Calus, et Caeneus et Malphus abire parabant, Cum rursus Cucuphas, quo nescio saucius ictu, Ad conniventem Salgam conversus, ain tu, Scribet adhuc molles Elegos tuus ille Petrarcha! Sic equidem aiebat. Sed qui pote? viderit ipse. Non sum sollicitus, pro quo et tam sollicitus tu. Ast olli metuo, subridens intulit hircis Obliquum tortis. Satyrarum Scriptor amarus Idem sit lepidus tenerorum lusor amorum? Terra prius stellas, silvas feret igneus aether. Non bene conveniunt, nidoque morantur in uno Milvius et turtur; pardo male iunxeris agnum, Aut vitulum, damamque lupo. --- ---- crassa solemus A liquidis: mollem a cantu secernere duro Suadebit ratio. non omnia possumus omnes. Certa nimis vox est, et numinis obtinuit vim; Cuique data est mensura sui finita: nec ultra, Nec citra se ferre licet. Tunc Baudius ursit; Quid cum Papinio Nasoni, cumque Tibullo Commune est Flacco? vel ei quo claret Aquinum? --- an una eademque pharetra Tela Iovis capiet, parvique Cupidinis arma? Quare edice tuo: potius me iudice bella Horrida, Teutonicas acies, totumque supinet Romanum Imperium, statuamque in calce relictam Tideus, Hippomedon, Capaneus quaerantur in armis. Paeligni Vatis vineta intacta relinquat! XXXII. Dixerat. Opponens contra sic Salga profatur: Non credis, Baudi, secum pugnantia posse Carmina diversi matura saporis eadem Profluere ex vena? proprium aut sortita meatum Quaeque putes, unoque neges manasse canali? Atqui ego non dubito. Rem sic expende; profundi Observanda maris facies, quae fervet in alto Pectore, ventorumque fides. an Caurus, an Auster Ira, an amor spiret; tumeat dolor, anne voluptas Fluctuet, an placido iaceat tranquilla sinu mens. Cordis namque fretum variis affectibus actum Aestuat, et Scyllas saepe obicit, atque charybdes, Et Brevia, et Syrtes. Maris est eadem atque hominis sors Est Vates quasi nauta sui. Tu prospice, quando Grandibus utendum velis, parvaque phasello. Denique Pegasidum quid suadeat aequor arandum, Si vacat, Ismeno, Lernaque palude relicta, In Sulmonis aquas lusum deducere cymbam Ingenii. In caveam Pinum, Boreamque relega, Stridentemque Eurum, atque animi compone tumultum. Nil trucibus Thebis, trucibus permitte Mycenis, Solus amor motis aspiret flamina pennis, Et trepidi luctus, et grati in amore dolores, Tum ponenda manu, quae cocta bitumine tela Statius Ogygiis iniecit turribus, aut quae Pisaeus Phlegyas; et quae sensere Gigantes. Pro gravibus gaesis Ovidii breve missile punctim Crinales vibrentur acus, scintilla oculorum. Talis, ubi tonitru sceleratum exterruit orbem Iupiter iratus, centenaque fulmina torsit, Vindictae tristis satur, officioque peracto, Nubibus egreditur piceis: iterumque sororis Nuptae laetus adit mensam, nectarque resumit. Haud secus ignivomo consumptis sulphure diris In vitia, et nostro manifesta piacula mundo, Hipponactaeo tetras hinc inde favillas Spargenti, carmen succedat amabile, nullis Sentibus hamatum, nec dente, nec ungue timendum. Undenis pedibus current ad gaudia ruris Assueti versus, viso insanire petauro. Quique fricant, tondent, pugnant, medicantur, et urunt. Aeolio maneant tantisper carcere clausi. Quaeque prius tetigit summas aspergine nubes Spumea, et exsultans, mox subsidentibus undis, Lactescat niveo mollis facundia rore. Non minor ars haec est, per singultantia verba Affectus varios agili versare cylindro. XXXIII. Finierat. pergunt furiis agitatus iniquis Baudius infremere, et Cucuphas, terram pede pulsans Sicut equus (vel sicut equo iumentum affine) --- solvitque in verba salivam: Nondum persuades, quidquid moliris; ut illum Diique, Deaeque omnes! Charites vis dicere? dirae Eumenides volui; verum haec sententia nostra: Seria fila nimis subtilia pro Satyrisco, Et Satyris fures ducentibus, ac nebulones Ad restim: quid enim restat, nisi denique restis? Rectius aequoreas discant torquere rudentes. --- Amphitrioniades, clavaque, suaque Pelle Leonina, tunicamque indutus amatae Femineam Lenae: quamvis deducta caveret Frangere pensa manu, tamen informisque, rudisque Stamina continuo male sedulus omnia rupit. In risum spectans Iole resoluta, ferocem Admonuit verbis nil proficientibus. Impar Imparibus numeris erit hic quoque. ludere textis Nescit imaginibus de bysso: nescit amare. Nescit, quam graciles ductus Elegeia requirat. -------- XXXIV. Irruat in pingues; solita argumenta furoris Imponat plaustris. quot testamenta resignet Naevius, Imbrosiusque socer, patruusque Micepsa. Quot pupillorum tabulas mutaverit >Annur Iura quot heredum, bonaque oblimaverit Herpus. Quot gener Eurytion? et tu Madorenna bilinguis Delator falso quot circumscripseris ore. Talia scrutari iubeam; vel in acta referrem -- Congestas Zuffi praedas: quot adultera coniux Cingula possideat; numeret, quot Cerberus offas Expulerit, quando cunctantem, atque ora trahentem Taenario extraxit Victor Tirynthius antro. Scribat, quot muscas aestivo sole volantes Impatiens captas mactet Golo: pulicibus quot Retia Polidii socrus Marconia tendat. Quid Maurillus agat, cum nil agit, et quid agat, cum Actum agit, aut asinum ---- -- Scribat de montibus, unde Virgil eclogue 2.18Alba ligustra cadunt, vaccinia nigra leguntur . Inquirat porro, quot latro squameus ille Archemorum stringens cubitos aequaverit anguis? Qua tela constet succinctae palla Megaerae; Ex qua materia rimosae texta carinae Portitor infernus refici, et quo tempore curet, Quando instant plenis animarum examina ripis. Absolvat Proculi, Meniique, immane volumen, Par Tubingano, si non est maius, ut aiunt In quo iactantes verboso praelia fastu Factaque (vel facienda) --- futura; Et genus et proavos, et quae non fecimus ipsi Nomina dant, titulumque gerunt, famamque merentur Multum isti libro debent Aurantius, Haspis, Et Gaulus, Gaulique gener, Strabotta, minorque Virnius, et Fesuli pater, et Tardona Syriscus. Si meliora petit, sequor, et caelestia monstro. Tempus in aethereos luctari fortius axes, Demens funeream sibi non circumspicit arcam, Cumque soporifera procurat lintea virga. Fata vocant. instat lux ultima, tempora currunt Praestiterit factis violento irrumpere caelo Quam verbis implere forum, mulgere capellas. -------- XXXV. Atque ita discessum est. pronus ruit interea sol Oceano, nox atra cava circumvolat umbra. -------- XXXVI. An nondum sentis mea quo collineet hasta, Optime Sfondrata, et fratrum lux prima tuorum? Me sequere auctorem, et praeter sine plurima labi. Crabronum stimuli sunt probra obiecta: feruntur Tam levibus pennis, quam nix: iterumque liquescunt. Sperne obtrectantes nec acerbum pasce dolorem. Multa potest tenuis difflare cachinnus in auras. Si modo constanti rerum firmeris ab usu, Et costas adamante liget patientia victrix. Quam miser est, quem nemo fugit, nemo odit aperte; Qui cunctis ad vota placet. Convicia malim. Nuper cum calvum Te diceret esse poetam Sergius, et ficum digito monstrante vocaret, Frendebas instar Calydonis peritus apri. Maior Sergillum poteras sprevisse minorem. Qui cupit ulcisci, laesum se vile fatetur, Gaudiaque et laetas segetes male nutrit in hoste. XXXVII. Ergo age, quamtumvis immensa mole premaris, Foedarumque avium tua fama subhaereat ungui, Ut laceri plumis stillet labentibus aether, Semper penna tamen spoliato linuqitur una, Scribere qua possis mutum vulgante dolorem, Donec succrescant aliae, famaeque priori (Sic poscit natura avium) reddaris, et alae. XXXVIII. Esto quoque ad vulgi vocem (quia fletus inanis,) Et creperos plausus surda intractabilis aure, Quodsi pulsatis foribus tibi gloria supplex Offerat aut cristas, aut non ignobile sertum, Intromitte quidem, sed non in pectoris aulam. Musaeo paelex nocet interiore recepta. Tunc te felicem dices sine crimine, si nec Terret Aristarchus, nec mulcet Chaerilus Emptor. Supra fortunam est, qui non metuit fortunam. XXXIX. Invenias homines mente alba, et moribus albis, Quorum unum studium est, studiosis posse nocere. Hi nec agunt quidquam praeclari, et agentibus obstant Ut saepe ignarus faeno canis incubat, et quo Non fruitur, nulli permittit inutilis uti. Quid facias? parces nihilominus altior hoste Non omnes digni sunt vulnere nobilis irae, Ictericam satis est contemptu scalpere venam. Tunc exsultabis, cum te velit esse sepultum Ante necem, ridens quem ad fletum cogere possis. Quisque suum proprium est fatum sibi, quale facit, fert. XL. Iam nunc invidiae curandum trade Marocum, Oblatrasse tuo nuper qui fertur honori. Invidia Siculi non invenire Tyranni Tormentum maius; Phalaris nil atque Perillus Peius habent. nam quid mugitum ferre Iuvenci? Lentius exurit bos intra viscera clausus, Torqueturque minus bovis intra viscera clausus. XLI. Haec ad danubium, quo vir clarissimus anno Schorerus post lustra decem, trieteridas octo Naturae impensas mortalem vivere vitam Desit, et placida compostus morte quievit. Tres inter Reges, primi quod nomen habebat, Implevit meritis, senium virtutibus auxit. (-quodque immane bonum est, et pluribus inconcessum) Divitias, et opes caelo secum intulit una; Heredemque Deum transcripto ex asse reliquit. Testamentum ingens! Ex illo tempore gaza; Sicutin hoc nostro rarissimus aethere Phoenix, Ales sacra Deo est: ungues removete profani! Non licet addictas superis convellere pennas. Numinis Haec avis est, fulvo Iovis alite maior. Nam fulmen maius fert, et contempta minatur. Utcumque est felix, qui sic discedit in orbem Ex hoc orbe novum, nullo ut maerore gravetur. Sarcina nulla premat. Quid vis? stant littore puppes. Diverso multum fato plerique recedunt. Heu! iacetin lecto maerens, et volvitur aeger Indomitis stimulis morbi, dolor urget, et urit. Haeret adhuc animus fixus mortalibus arvis, Atque opibus falsis. Non est mens conscia recti. Ius, vis, fraus, animi triplex tinctura fuerunt. Hinc lacrimae. gemit ante thorum tristissima coniux (Res incompositae) sparsos lacesata capillos, Complorant nati, frustra solantur amici. Omnibus his curis liber Scenorerus, et intra Semet collectus, nulloque interprete mortem Intrepide affatus: Salve! terram pede pressit, Astra manu rapuit, corpusque abiecit humandum, Ut dormiturus vestem exuit, ac sopitur. Exstruite argenti cumulos, auroque potiti Exornate domos, caeloque educite tecta. Linquenda est tellus, et fundus et hortus et uxor, Et soboles, et quae sevisti poma, nucesque. Admonet occasus, qui nos praetermeat Ister, Cum raptis secum fluviis excreverit ingens, Fit minor, et salsis pelagi sorbetur ab undis. Nos sorbebit humus; tandem dilabimur omnes In mare sicut aquae. Musae, charitatesque venustae, Insontesque ioci, Satyri, Satyraeque valete.
ELENCHUS.

I. Vita hominis censuris obnoxia.

II. An auctoris habitudo corporea, quam Graeci crasin, Latini temperamentum, barbari complexionem vocant, bona sit, et qualis?

III. An illi genesis fuerit propitia?

IV. An sit bene moratus, an munditiei politioris studiosus?

V. An eiusdem mollior coma iustam criminationibus causam praebeat?

VI. An auctor sit reus, si torvus? an libenter paradoxis occupetur? an regulas torvis praescriptas servet? an torvi ad torva animalia ablegandi?

VII. An in auctore plura ornamenta possint culpari? an eius staturam, membrorumque symmetriam ullius vestimenti genus cohonestet?

VIII. An sit vir gnavus, et industrius?

IX. An eius ignavia possit demonstrari?

X. An ei a poeticis commentationibus primum nunc sit desistendum, quod Cucuphas monet.

XI. An Capito Rhenanus prudentius suaserit contrarium?

XII. An potius pergendum in contionibus? pluresne Poetae dentur, an oratores, quod Buschius negat.

XIII. An auctor sit proprii iudicii in materia scribendi oblata, acceptanda, eligenda? circumspectus? difficilis? et contumax?

XIV. An oscam Cascam Poesin tot saeculis consepultam multorum ingratiis refoderit? an tune libidini agis ingenii sarcastice indulserit, quam disciplinis iuvandis? an libertas ingenuis scriptoribus permittenda? an calami sacrorum vatum in ollas coquinarias iniciendi, id est, an decorum sit Musas liberales illiberales fieri in gratiam procerum, famulas, lenas, cyngaras, etc. idque spe, vel mercede umbratici favoris?

XV. An Auctor scribenda quaedam prudenter subterfugerit?

XVI. An auctor sit Politicus, curvus, an rectus?

XVII. An bene iudicet, quaedam etiam minoris momenti celanda esse?

XVIII. An sit aulicus, comis, urbanus? an eius famam minuat praesentia?

XIX. An quidam Physiognomicae periti, ac profundioris consilii Viri magnificentius sentiant?

XX. An auctor sit morosus, obstinati silentii homo, Democrito, an Heraclito similior?

XXI. An auctor certis remediis, ut quidam canitiem pharmaceutice accersunt, sic avertat, vel retardet? an incognitis vitam producat?

XXII. An operae prettum fuerit austorem aegrum ac desperatum sanitati restitui, prostratam valetudinem erigi?

XXIII. An auctor sit vere macilentus? an Oculos tantum ludificet?

XXIV. An sit Cacostomachus?

XXV. An frugalis, an gulae delicatae?

XXVI. An figura poculi cerealis sit eadem, quae poculi Castalii Poetarum?

XXVII. An auctor sit nimis tetricus et severus?

XXVIII. An poetice assentari soleat: an negligat amicos mortuos?

XXIX. An fragmentum funebris Elogii, quod auctor piis manibus Claudii Memmii Avauxii Illmi. Gall. Legati consecravit, votis et exspectationi Familiae respondeat?

XXX. An Arcesilas auctori cupressum et herbam funebrem fideli animo porrexerit?

XXXI. An Satyricus scriptor praeter rerum ordinem possit esse etiam Elegiacus?

XXXII. Qua veri similitudine etc. Salga probaverit hoc fieri posse?

XXXIII. An auctor malis omnibus et diris debebat devoveri, quo minus destinatas Elegias perficiat?

XXXIV. An argumenta cantandi, quae Cucuphas suggessit ex malefido ingenio, sint potiora?

XXXV. Totius scriptionis Anacephaleosis.

XXXVI. Ad Paulum Frobenium admonitio de Contemptu Dicteriorum, calumniarum, convitiorum.

XXXVII. Secretum contra columnias et convitia.

XXXVIII. Secretum contra vanam gloriam.

XXXIX. Secretum contra invidos, aemulos, goffos etc.

XL. An Iuvenalis recte pronuntiaverit invidiam omnium tormentorum est maximum.

XLI. Epilogus auctori in Satyricis usitatus, de brevitate vitae, contemptu mortis. Elogium nobilis et strenui Domini Melchioris Schorer Neoburgi pientissime defuncti Anno M.D.C. LVII.

FINIS.