ANDREAE BALDERSCHLEBII SANGERHUSANI.

Vivus ac moriens sum Domini.

VItam seu dederint, vitam seu fata negarint;
Dulce mihi in Domino, vivere dulce mori.

Aliter.

Tota penes Dominum vitae est mortisque potestas:
Ergo Deo morimur: vivimus ergo Deo.

Ad huc.

Est mortis pariter Deus, est etiam arbiter aevi:
Huius sum vivus mortuus huius ero.

Item.

Lucem seu videat, lucem seu vita relinquat;
Esse scio, qui me curet ametque, Deum.

Vel.

Nostra salus Deus est, non solum tempore vitae:
Est etiam mortis tempore nostra salus.

Aut.

In Domino quisquis didicit spem ponere; mortis
Scilicet et vitae tempore salvus erit.