Victoria Christi ab Inferis. Carmine Heroico Helio Eobano Hesso Authore
Erfurt: Mathes Maler, 1517
4o: 12 leaves
Text submitted by Harry Vredeveld. The orthography and punctuation of the original have been retained. I have silently corrected obvious printing errors, expanded the abbreviations, normalized the use of i/j and u/v, and, where appropriate, added paragraphing. For a critical edition, with translation and commentary, see: The Poetic Works of Helius Eobanus Hessus, vol. 3, King of Poets, 1514-1517 = The Renaissance Society of America Texts and Studies Series 1, ed. Harry Vredeveld (Leiden, Boston: Brill, 2012), pp. 423-507, 651-92.
There is a connection between Hessus' Victoria Christi ab inferis and Johann Spangenberg's Triumphus Christi heroicus (Link).
image
[A1r]
Victoria Christi ab Inferis.
Carmine Heroico Helio Eobano Hesso Authore
image
[A1v]
CLARISSIMO VIRO HENRICO APERBACcho
Georgii Filio Medico Insigni. Eobanus Hessus. S. D.Fugit hyems. Abiere nives. Nova gaudia rerum
Alma sinu pandit luxuriante venus
Indole nativa redeuntem gratia mundum
Imbuit. et vultu candidiore venit
Nunc propiore Deo genitivae munera terrae
Sponte sua virides explicuere comas
Vernat humus. frondent sylvae. Iucundior Aer
Spirat. Amabilior temperat aura fretum.
Omnia vere novo nova sunt. Totumque per orbem
Pube nova ridens omnia vestit Amor
Nos quoque degeneres Elegos. levia ista. perosi
En damus Auspicio Carmina facta novo.
Qualia credidimus victori Acheruntidos orae
Quamlibet audaci pectine. digna cani
Quandoquidem reduci nova plaudunt omnia Christo
Non decuit moestam nos habuisse chelim
Quando novo alludunt avium tot milia veri
Pieridum cannas quis tacuisse probet?
Illo precipue Phoebo ductante Choream
Quem peperit nullo Pieris usa viro
Illo precipue et tanto Pythone perempto
Vincere quem potuit non nisi tanta manus.
Leticiae nunc ergo novae Paeana canentes
Fas erat assueto tangere maius Ebur
Quae tibi Aperbacchi laus prima Henrice decusque
Nominis. exiguo de lare prompta damus
Sed quae non aliter. quam nos quoque. et omnia nostra
Quam mea se debet Calliopea tibi
Quod si pro meritis cupias tibi digna remitti
Sperare Ingentes iam potes Iliadas
Accipe parva tamen quo sunt data pectore. et ista
Adsere qua vatem dexteritate soles.
Sic neque degeneris metuent mala nomina famae
Sic neque qui noceat zoilus ullus erit.
image
[A2r]
VICTORIA CHRISTI AB INFERIS
PER EOBANUM HESSUMInfernae victa arma domus. populataque nigri
Regna Iovis. tetroque ereptos carcere manes
Dicere conanti. solito maiore Camoena
Christe Triumphatae domitor Stygis influe vati
Inque opus exiguum (Si non tua sancta perosus
Numina. Si veterum delyramenta Deorum
Te duce contempsi) non dedignare vocari
Cum tener esset adhuc. et adhuc pubesceret Orbis
Vixque recens nato penderet in Aere. Necdum
Firma satis Iuveni staret concordia mundo
Naturae statuit pater omnia nexibus aequis
Ut certas elementa vices. et sydera rebus
Influerent. ut foecundo gravis ubere tellus
Vitam animis. viresque daret. productaque nuper
Sponte sua vegetis animalia pasceret herbis
Aera aves liquidum. tranarent flumina pisces
Deque Caho veteri species nova prodita. nusquam
Perderet agnati coeuntia foedera Regni
Non tamen artifici visum satis esse Monarchae
Imperium fundasse ingens. sine semine mentis
Aethereae. vacuumque novis cultoribus orbem
Frustrari magnae pregnantia viscera matris
image
[A2v]
Condidit ergo animal princeps. dominumque vocavit
Imperiumque in cuncta dedit. viventia nedum
Verum etiam quaecumque videt Sol magnus ab alto
Quaeque illo propior Lunaris obambulat orbis
Hic mihi nec Pyrrhae iactus. priscumque referri
Deucaleona velim. Non usum fomite virga
Vitaleis caelo rapuisse Promethea flammas
Hoc igitur divinae animal rationis. ab illo
Temporis. agnata coeptum est homo voce vocari
E terra genitum: informis quota portio terrae
Quam pater (ut memorant) agri de parte Damasci
Abstulit. inque suis posuit viridantibus hortis
Aere perpetuo Veris. flatuque Favoni
Caelestis. sed pulchra novis data regna colonis
Improbus invidit serpens. vetitique suasit
Nondum gustato vesci de germine ligni
Hinc nos prima mali labes. hinc prima ruinae
Decipula involvit: miserum genus. Inde per amplum
Iactati pelagus curarum. dulcibus arvis
Exuimur. nudique foras expellimur. hinc nos
Exilium. durusque manet labor. anxia vitae
Conditio. et semper miseris obnoxia curis
Clausaque caelestis remoratur ianua Regni
Patribus annorum tot milibus invia nostris
image
[A3r]
Quam neque cognato caelo superumve hominumve
Effregere animae. Donec miseratus iniquum
Humani generis. quod condidit ipse. laborem
Rex hominum divumque parens. Ille unicus orbis
Conditor. intactae castam per Virginis aurem
Ingrediens nostrae venit regionis in oram
Tectus [Tactus 1517] et humanae lutea testudine carnis
Natus homo est. matrisque deum non exuit alvo
Nunc age Creteae pudeat te Iuppiter Idae
Uberaque Oleniae simula nescire capellae
Ille fidem nugis mendacibus abstulit omnem
Per quem recta fides erranti est reddita mundo
Iam miserae annorum post milia quinque iacebant
In tenebris animae et coecae caligine noctis
Lucem expectantes requiem finemque laborum
Cum deus humanae defunctus munere vitae
Fatalis moriens regnaret ab arbore ligni
Sanguineo vultum Sol obscuravit amictu
Tam dirum non ferre potens. tam triste perosus
Supplicium. Quid enim ille sui non mortuus esset
Morte creatoris. Tum cui rubuisse nefandum est
Luna oblita sui cursus stetit ore cruento
Non quali memorant ad Lathmia saxa rubore
Confusam petiisse nefas. et dulcia furta
image
[A3v]
Continuo invasit terram nox atra trementem
Confusumque cahos. et iam non cognita rerum
Tempestas. procul et montes. et rupibus altis
Culmina conciderant duris horrentia saxis
Totaque naturae facies miserabilis atro
Tabuerat luctu. et casu moerebat amaro
Desinite ah fatuae mentes per Carmina quemquam
Credere posse vices naturae invertere. et ipsam
Ducere de caelo Lunam. magicisque susurris
Concutere immotae solidissima pondera terrae
Viderat ista procul Dyonisius Attide terra
Atque ait. aut mundus finem casumque minatur
Aut mala naturae patitur Deus ultima. nam nec
Sponte sua tantos cogit natura labores
O divinum animi lumen. mentemque beatam
Quae potuit causam insoliti cognoscere motus
Nox erat et medio firmata silentia cursu
Prepetibus ducebat equis soror Aurea Phoebi
Regna Acherontei tenebris horrenda profundi
Intremuere procul. gemituque immugiit omnis
Umbrarum domus. et vastae sine luce cavernae
Dant sonitum. fugit ipse intus. limenque relinquit
Incustoditum. tria Cerberus ora cohercens
Quaeque fluenta umbrae circum Laethaea volabant
image
[A4r]
Spem capiunt. memoresque iterum lucisque suarumque
Intentae expectant. quae tanta potentia sedes
Conquatere infernas. magnumque lacessere Ditem
Audeat. Ipse cava specula caput extulit atrum
Regnator [Raegnator 1517] Stygis. et magna Prospexit ab aula
Cum procul ecce autem signis pallaque rubentem
Ad sua (novit enim) tendentem limina Christum
Aspicit infestis ruiturum Tartara signis
Consiliique et mentis inops. Ergo Ibimus. inquit.
O socii. Regnumque hosti linquemus inulto
Exiliumque vagis. nullaque in sede quietis
Inculti pars orbis erit. Quaecumque sub Arcton
Indurata gelu mortalibus invia marcet
Excluditque animas in nostrum nomen ituras
Non licuit patrio quondam considere regno
Concessoque frui Imperio. quin protinus alto
Deturbati omnes caelo. Regna ista subimus
Tam longo a superis spacio intercepta. nec ulla est
Unde via ad caelum redeundi. nulla facultas
Has quoque non prodest Sedes coluisse tot annis
Invisas caelo. et caligine semper opaca
Fumantes. scaevoque calentia sulphure regna
Pellimur his etiam. potuit frigere relictae
Dulcis Amor patriae. Iam consuetudo malignum
image
[A4v]
Leniit exilium. longoque induruit usu
Sarcina curarum. nunc ille Haebraeus Apella
Perfusus sanie pectusque. manusque. pedesque
Eheu quam timeo ne fortior Hercule nostras
Destructurus opes veniat. nec vincula tantum
Rupturus. Stygioque canem tracturus ab antro
Sed magis insignem ducturus ad aurea praedam
Sidera. Ne qua igitur teneat mora. Si qua salutis
Monstret iter fortuna. et si non ultima venit
Ista dies tentemus ait. Vos proxima raptim
Scandite tecta alacres. primoque a limine portae
Arcete obiectis conantem irrumpere taelis
Sed neque flammivomi quemquam truculentia vultus
Terreat. his armis quondam nos vicit. et istas
Depulit in latebras. putri loca foeta mephiti
Regalem interea nos hinc tutabimur arcem
Ne qua nocens propior vis ingruat. Ite per omnes
Insidias aptate vias. et fallite furtim
Nulla magis vos arma decent. Sic fatus Inermem
Dimisit numerum sociorum. illi agmine facto
Ad summa evadunt tectorum. et moenia complent
Lurida letiferis [laetiferis 1517] herbis. atroque veneno
Tum vero audisses tristes mugire cavernas
Mortifero gemitu. Cyclopaeoque ululatu
image
[A5r]
Sicut ubi impastos per brumam indagine sepsit
Hercinia sub rupe lupos venator. et omnes
Obsedit custode aditus. illi omnia circum
Vesana suadente fame. retinacula tentant
Totumque horrificis ululatibus aera complent
Haud secus inferni fratres dum moenia servant
Pro patria vastis feriunt clamoribus auras
Ecce autem insolita clarescere visa repente
Omnia luce intus. totumque admittere Solem
Squallida perpetuae noctis loca. cassaque nuper
Lumine sidereo. Totis nova monstra sub umbris
Terruerant animas. quae tanta incendia lucem
Ferre novam possint. posito stupefacta flagello
Constitit Alecto. Sociasque ad limina diras
Evocat. excussa stupet improba nocte Megera
Indignata etiam talem lucere per aulam
Tisiphone non sponte comantes aspicit angues
Tum primum (ut memorant) perculsae luce molesta
Tetrica [1542; Territa 1517] Lanificae ponebant fila Sorores
Verbera non illo quatiebant tempore dirae
Ultrices. tormenta iacent. gemitusque dolentum
Nusquam exauditi. tristes siluere querelae
Ipse Charon prima puppim stupefactus in alga
Sustulit. oppositam non ausus tangere ripam
image
[A5v]
Linquebat vacuum contempto Iure tribunal
Aeacus. et nullas Radamanthus iudicat umbras
Nec solita Minos Sortes ducebat ab urna
Conticet omne forum. Silet omnis curia sontum
Quinetiam aeterna penarum lege notati
Iussa. etiam fatis nolentibus. intermittunt
Tantalus immaduit iam non fugientibus undis
Pomaque non iterum tactum fugientia prehendit
Tum nec utrimque minax Ixiona terruit anguis
Quo minus eripiat sese immotusque resistat
Tu quoque non tollis revolutum Sysiphe saxum
Spemque capis veniae. tristi de rupe Prometheus
Extulit evinctas invito vulture palmas
Multaque preterea fatui ludibria saecli
Credita non frustra. placidam cepisse quietem
Credibile est isto quo tempore venit ad umbras
Quem superi. terraeque tremunt. Manesque profundi
Stabat opaca ingens ferali tecta cupressu
Porta sub aereum quae proxima pertinet orbem
Quam ferrugineo fortes Adamante columnae
Obiicibus cohibent crebris. vectesque cohercent
Ferrati. trabibus duris. ubi postulat usus
Verum ubi nulla potens superum vis urget. aperto
Limine semper hiat. Ditique patescit avaro
image
[A6r]
Haec tum multiplici stabat compage serarum
Tempore non ullo. non ipsa ab origine mundi
Clausa magis. non cum superum fortissimus orbem
Deseruit victum Alcides. maioraque famae
Praemia devicto peteret Phlegetonte perhennis
Non etiam cum Pyrithoo comitatus amico
Impiger Aegides dominam deducere Ditis
Aggressus thalamo studio defecit inani
Non cum Troiugenam Aenean Cumaea Sybilla
Duceret ad manes auro frondente beatum
Ergo ubi discussa durae caligine noctis
Adstitit. et clara omnipotens in luce refulsit
Victor ad obstantes sic fatus dicitur umbras
Ergone victori. Regique haec limina [lumina 1517] vestro
Clauditis. et contra audetis capere arma Tonantem?
Quin agite umbrarum proceres. attollite duras
Portarum vectes. frustra est obsistere Divis
Haec ubi dicta. Animis pavor incidit[.] ocyus omnes
Qua via cuique ruunt. totisque [totusque 1517] sine ordine castris
Turmatim effugiunt. non plures aere guttae
Deciderant cum saevit hyems pluvialis ab alto
Non tot ad Hesperium littus volvuntur arenae
Cum Notus incubuit gravior. verritque procellas
Non tam precipiti lapsu cecidere solutis
image
[A6v]
Arboribus glandes. Borea populante decorem
Sideris Autumni Iuga per Dodonia late
Sive per Hercinios saltus. Alpesque nivosas
Seu magis Obnobiis querceta virentia saxis
Nec mora cardinibus postes cecidere solutis
Cum sonitu. ingentemque dedit prolapsa ruinam
Ianua. non aliter quam si Iovis igne repente
Tacta cadat. sonitumque trahat super aequora Rupes
Est locus Elysium veteres dixisse poetas
Crediderim. vel si qua fides est verior illis
Vestibulum ante domos caecas Acheruntis avari
Antrum immane patens. longo incomplebile tractu
Nulla dies. nullae aurae intus. crassissimus Aer
Occupat. et densis nebulis penetralia opacat
Ille locus sanctas animas. manesque piorum
Continuit residi per tot iam saecula Christo
Quo simul ut venit. tremere omnia lumine circum
Visa novo. totoque aperiri tartara caelo
Primus ibi ante alios viridis pater incola regni
Adfuit Adamus. palmasque ad sidera laetus
(Sidera sunt ubicumque deus) sic voce precatus
Extulit. O tandem longis optate querelis
Expectatus ades miseris. Invicte redemptor
Da requiem finemque malis. fer ad astra receptos.
image
[B1r]
Talia dicentem patres clamore sequuntur
Laeticiam testante novam. quos maximus inter
Progreditur gaudens Habraam. dominumque salutat
Pone subit puer Isaac. Quem iusserat olim
Ense patris sacram mactari Numen ad aram
Filius hunc sequitur generosa prole beatus
Hic Iacobus erat. Iuxta formosus Ioseph
Quem custos ovium tulit ex Labanide nympha.
Regia magnanimum quem victa libidine coniux
Flectere cum nequeat Regi sub crimine falso
Detulit [Daetulit 1517]. et nimium paena multavit acerba.
Quid memorem antiquum Mosen. qui duxit in arva
Promissae genus Israel foelicia terrae
Quae niveo cum lacte fluunt flaventia mella?
Quid Iosue invictum? magnumve morabor Aaron?
Quidve alios referam. ducibus quibus inclyta semper
Israelitici permansit gloria sceptri?
Non procul his aberat Machabaeus origine Iudas
Magnanimus patriae Vindex vir maximus armis
Inde alii quos tam datur enumerare facultas
Quam quot in Ionio putrescant littore conchae
Ecce autem sacros quondam fortissima vates
Pectora. tam pulchro quis non miretur euntes
Agmine? ad ignivomum velut Aurea sidera solem
image
[B1v]
Foelices animae quibus alti praescia fati
Mens data ad aethereos potuit penetrare recessus.
Sublimesque habitare domos non vincta cathenis
Corporis infirmi non obruta mole laborum
Quo minus humana regnans in carne Deorum
Concilio frueretur. et omni libera nexu
Ultima transiret magni confinia mundi.
O animae decora umbrarum decora aetheris alti
Quis vestras poterit laudes aequare canendo?
Carmina qui poterint vobis cecinisse poetae?
Digna satis? non si arguto magnum Orphea plectro
Non si Maeoniden superet Musamque Maronis
Vobis ille quidem divinam in Carmina mentem
Influxit magni lustrator spiritus orbis
Enthea sanctorum quem spirant pectora vatum
Non qui furta canunt Veneris. turpesque Deorum
Concubitus. tenerique insana Cupidinis arma
Sed qui de superis non impia. Qualia vobis
Carmina caelestes inspiravere Camoenae
Foelices animae ter et amplius. Ite potentem
Victoris dextram contingite. dictaque nobis
Commendate pio votiva precamina Regi
Haec aliquis. vel plura etiam. cum candidus ille
Progreditur chorus. et magnum reverenter adorat
image
[B2r]
Victorem Stygis. et domitorem noctis opacae
Regius ante alios ruris quem laeta paterni
Pascua servantem. pecudumque armenta sequentem
Cinxit honorati Samuel diademate Regni
Sceptraque habere dedit post victum Regia Saulem
Versibus hic clarus Lyricis. vocalis Eburno
Psalterii resonas tangebat pectine chordas
Stirpis Iessaeae David notissima proles
Qui simul ut magni stetit ora ante inclyta Christi
Talia magnanimo de pectore verba profudit
Nec me adeo caeca clauserunt nocte tenebrae
Nec datus a superis tam spiritus ille fefellit
Ut mihi non animo semper spes certa sederet
Te pater afflictae tandem post plurima plebi
Saecula venturum auxilio. Sic namque canebam
Praevidique olim praesaga mente futurum
Nunc etiam cum me nigris in vallibus Orci
Innocui audirent referentem talia manes
Obstupuere aliqui et spem concepere Salutis
Verum alii numerare annos et tempora frustra
Arguere. Oraclisque erratum credere priscis
At nunc certa fides postquam mea dicta sequta est
Ad tua credentes animae. mortisque levatae
Imperio genua advolvunt. et qualia possunt
image
[B2v]
Vota precesque ferunt. Non quae decuisse triumphum
Victor magne tuum possint. Nunc ergo beatis
Da pater oramus patria gaudere recepta
Talia dicentem ad sese Davida recepit
Omnipotens. dictisque animum solatur amicis
Tum chorus ad numeros una omnes voce precati
Dulce melos tali resonabant Carmine vates
Tandem laeta dies. totque expectata per annos
Venit. et oppressos tenebris et nocte profunda
Illustrat candore novo. nunc cernere coram
Christe tuos. illosque licet cognoscere vultus
Tartara quos inferna tremunt Stygiaeque paludes
In quibus est omnis dulcedo. et summa beatis
Leticiae. terrorque malis. Ad funera quorum
Tota stupescentum concussa est machina rerum
Salve magne Erebi victor. Salve inclyte mortis
Infernae domitor. vitae o fortissime vindex
Amissae. tua nos nunc tandem iusta precantes
Ad genua admittas nosque illos esse memento
Quos tua (quae magni domuit nunc infima mundi)
Dextra potens propriae foecit de semine mentis
Desertam patriam. atque illam complere ruinam
Quam dedit aetheream linquens ille improbus arcem
Spiritus infernique accepit sceptra regendi
image
[B3r]
Talia festivo resonantes carmina plausu
Agnifer anteibat Iuvenis. Qui nuper ad umbras
Venerat. et dixit rapidum se ad Iordanis amnem
Vincula qui passos redimat lavisse futurum
Tum sic omnipotens Manes affatur amicos
Omnia complexum quo tempore fecimus Orbem
Multiplicisque nova compage volumina caeli
Iunximus. et rerum genitalia corpora vitae
Influa naturaeque vices. Tum ne qua maneret
Pars deserta poli. Paradisia regna creato
Incolere. et proprios homini concessimus hortos
Foelix ut totum Regnis vitalibus aevum
Degeret. haud morti nec fato obnoxius ulli [ullo 1517]
Verum quod dedimus iussum [iustum 1517] transgressus. et angui
Plus fidens. proprio poenas pro crimine pendens
Pulsus ad incultas rediit novus incola terras
Tempore ab hoc caeli mortalibus invia semper
Porta stetit. nullique datum transire per alta
Sidera. Sed magnae dedimus loca proxima Abysso
Exilium patrio vetitis consistere Regno
Nec tamen interea volventibus omnia nobis
Excidit ille ardor. quo vos ab origine rerum
Fovimus humanum genus. Hinc ergo ultima passi
Insidiasque ulti serpentis. et impia facta
image
[B3v]
Venimus. et tandem miserati indigna ferentes
En et opem ferimus. Rursusque a morte redemptis
Ad vitam reseramus Iter. Vix ista loqutum
Haud mora confuso circumstrepere ordine manes
Laeticiamque novam plaudentibus aedere dextris
Tum pater effractis portarum molibus. intro
Vi subit. et penitus nigri squallentia Ditis
Limina perrumpit. latebrisque immanibus ipsum
Elapsum. et vacua cupientem in sede latere
Necquicquam aspiciunt comites. Quem protinus inde
Extractum. totasque ululantem triste per umbras
Implicat et vinclis. et carcere frenat opaco [opaca 1517]
Horrendum ille sonans religatos palpitat artus
Immordetque seras. indignaturque teneri
Sicut ubi incautum deserta per arva Draconem
Agricolae fallente Lybes clausere catasta
Deceptum ille dolens sese. penetrabile virus
Colligit. acre micans oculis. caudaque reflexa
Contrahit ingentes spiras. et naribus ignem
Evomit. ac nebulis mortalibus inficit auras
Haud secus humani generis latro. et improbus osor
Legibus arceri invisis vinctumque teneri
Indoluit. contra necquicquam vincla renitens
Victa igitur rabies elanguit illa maligni
image
[B4r]
Insidiatoris. qui nunc quoque vinctus in ista
Illuvie Imperium spoliata exercet in aula
Excubiasque agit aeternas. fraudumque ministris
Non minus ex toto repetit spolia eruta mundo
Sic igitur domito dextra victrice profundo
Legeque prescripta Stygias habitantibus oras
Ad superas iterum terras Acheronte relicto
Extulit omnipotens victricia signa. suoque
Restituit regno et considere iussit avito
Est locus Aurorae primo venientis ab ortu
Nobilis. a nostro. tractu maris. orbe remotus
Immenso altivagam contingens vertice Lunam
Purus ab aereis nebulis. Ubi maxima caeli
Porta patet. veterum si vera est pagina vatum
Chrysolitis rutilant plenis. et Iaspide multa
Topasioque graves inter fulgente pyropos
Vivaces muri. semperque virentia pulchro
Maenia praetextu. portarum splendida tecta
Caelestes habitant animae. tenuissimus Aer
Spirat. et aeternos florum conservat honores
Sunt et perpetui Soles. Est perpetuum Ver
Vivida perpetuo nemoris viret umbra beati
Illic mille avium voces. caelestia credas
Nectare labentes circumstrepere organa Rivos
image
[B4v]
Summa voluptatum locus ille et deliciarum
Ex re nomen habet. toto Paradisus in orbe
Cognitus. et culpa matris clarissimus Evae
Quo postquam ereptos Stygio de carcere patres
Undique caelestum coetu applaudente reduxit
Aeris ipse cito rediit per inania lapsu
Ad Solimas arces. ubi miles pervigil ipsum
Sarcophago clausum cura servabat inani
Hortus erat viridi palmarum uberrimus umbra
Montis in ascensu primo declivis in Eurum
Illic excisa positum sub rupe tenebant
Armati Iuvenes. necquicquam morte peremptum
Iamque propinquabat Croceis Aurora quadrigis
Oceanoque diem ducebat Lucifer almum
Nondum vicinae totum caligine noctis
Exutum. Quo prima novi per gramina rores
Tempore sparguntur caelumque albescere tractim
Incipit. et dubiam vix est agnoscere lucem
Cum subito ecce novo circum tremere omnia motu
Terribilesque horrere aurae. mugire reclusis
Terra adytis. magnoque malum terrore minari
Nec mora dant gemitum et tumuli collapsa residunt
Claustra. dehiscentique patescit Ianua rima
Iamque novo circum perfusus lumine Christus
image
[B5r]
Quem Iudea neci nuper demisit acerbae
Demissumque loco clausit. qua passus. eadem
Carne resurgebat tumulo. Iam tertius ibat
Lucifer infandae postquam per vulnera morti
Traditus. occluso latuit. non omnis. in antro
Ibat purpurea vestitus corpora palla
Corpora funestae iam non obnoxia morti
Vulneraque illa gerens quae nuper maxima quinque
Accepit moriens sola et superesse volebat
Funeris indicia. et mortis monumenta nefandae
Salve festa dies. victricis conscia palmae
Palmae quae terras caelo coniunxit. et uno
Labentem penitus fulcivit stipite mundum
Salve iterum nunquam meliori Lucifer ortu
Vise prius. Non cum primo. iam natus. olympo
Currebas iter insuetum. Quo frigida primum
Tempore (da veniam) parvi incunabula Christi
Vidisti non tantus eras. nec laetior unquam
Collegam erepta pepulisti luce sororem
Stabat anhelanti similis. similisque trementi
Sol novus a tumulo Christum miratus euntem
Quaeque ipso nuper doluit natura perempto
In faciem conversa novam se laeta resumpsit
Atque adeo viresque suas. geniumque profudit
image
[B5v]
Tanquam oblita modum. Tanquam se fortior ipsa
Luxuria cupidum tentaret pellice mundum
Interea armatos timor occupat. altaque pulsat
Corda pavor. cecidere animi. Vox aegra palatum
Deserit. attonitos tremor ambit frigidus artus
Nec minor eripuit mentem stupor. ut neque dictis
Auderent contra. aut sumptis insurgere taelis
Quin potius stupefacta iacentes corpora. tanti
Mirati victoris opus. Iam denique fassi
Non hominem. attonitam testes venere per Urbem
Surrexisse illum. tristi quem funere mersum
Servandum ad tumulum populus mandasset Iesum
Altera iamque dies atque altera fluxit. ut illum
Discipulos etiam et Marias vidisse Sorores
Rumor iit. famamque auxit spes credula vulgi
Illum etiam multi Galilaea in rura profecti
Viderunt. testes iam vivere carne resumpta
Sola fuit rabies recutitae incredula gentis
Necdum exuta nefas. nostrosque hoc usque sub annos
Permanet [Permanat 1517] infidum Christo genus. exiliumque
Aeternum patitur. nec certas incolit usquam
Terrarum sedes. sed finibus omnibus errat
Invisum caelo ac terris. pulcherrima postquam
Amisit sceptra Imperii. Regnoque paterno
image
[B6r]
Expulsum toto sine sede vagatur in orbe
Ille potens igitur mundi faber. Ille redemptae
Vitae author. domitorque necis. Post multa resumpti
Aedita signa hominis. Reducisque in corpora vitae
Post vitae erumnas. duraeque pericula mortis
Sublimi tandem per nubila regna volatu
Aethereos abiit populo spectante recessus
Unde datas mundo leges. et fata potenti
Cuncta manu regit. et parentibus Imperat astris
Last modified: April 14, 2013