December 2004 Ruediger Niehl markup
typed text - structural tagging complete - no semantic tagging - no spell check - orthographical standardization performed - corrections from the errata list not integrated
06/2007 Katharina Meiszus, Reinhard Gruhl markup
TERMINI Markup added - spell check partially performed
01/2008; 03/2010; 11/2010 Reinhard Gruhl markup
some corrections inserted
image: s000
[gap: illustration (Frontispiz)]
image: s001STEPHANI BLANCARDI LEXICON MEDICUM VIRI CELEBERRIMI IOANN. HENRICI SCHULZII OPERA INSIGNITER AUCTUM ET EMENDATUM NUNC DENUO RECOGNITUM VARIISQUE ACCESSIONIBUS LOCUPLETATUM CURANTE MICH. GOTTL. AGNETHLERO SAXONE TRANSILVANO. PRAEFATIONEM PRAEMISIT ANDREAS ELIAS BUCHNER POTENTISS. PRUSS. REG. A CONSIL. SANCTIOR MEDICIN. ET PHILOS. NATURAL. IN ACADEM. FRIDERICIANA PROF. PUBL. ORDIN. ET IMPERIAL. ACADEM. NAT. CURIOS. PRAESES. CUM PRIVIL. POTENTISS. POL: REG. ET ELECT. SAX. HALAE MAGDEBURGICAE, APUD IO. GOTTL. BIERWIRTH CIC IC CC XXXX VIII.
image: s002
[gap: praeliminaria]
page 513, image: s537PEDICVLARIS MORBVS, idem quod phthiriasis.
PEDICVLVS [1] idem est quod petiolus, quod nempe folium, fructus aut flos dependet. G. Der Stiel.
PEDICVLVS [2], est insectum homini praesertim infestum. G. Laus.
PEDICVLVS ELEPHANTIS, est anacardus, sic ob magnitudinem, et fortasse ob analogiam ita appellatur.
PEDILVVIVM, est balnei species, lavandis pedibus utilis, uti ipso vocis sono liquet. G. ein Fußbad.
PEDIVM, idem quod planta pedis.
PEDRA DE COBRA, est lapis ovalis figurae, ex uno latere planus, ex altero gibbosus, coloris fusci et splendentis, cuius virtus est alexipharmaca cum applicatur serpentum morsibus. Vocabulum a Lusitanis impositum. In serpente, dicit Cl. Kaempferus, quod vulgo credunt, non invenitur, sed arte secreta fabricatur a Brahmanis. Pro dextro et felici usu, oportet adesse geminos, ut cum primus veneno saturatus vulnusculo decidit, alter surrogari ilico in locum possit; hinc geminos habere debent indigenae, quos cum gossypio capsulae inclusos probe asservant.
PEDRA DEL PORCO, est lapis quadrupedis hystricis dicti, constans ex tomento, fibrillis, et materia friabili, subruffa, amaricante, et deforis quibusdam in partibus, ceraceis, et subnigris quasi unguibus coopertus, substantiae solubilis facile, ad linguae attactum summe et illico amaricans, eius vis sudorifera est insignis, dicitur etiam lapis hystricinus: iuxta Doctiss. Kaempferum, coagulum est biliosum, rotundum, satis compactum, ut plurimum nucis myristicae vel iuglandis magnitudine, leve, coloris rufi, substantiae quodammodo unguinosae, saporis subtilissime amarescentis. Reperitur in vesicula biliaria hystricum terrae Malaicae. Rarius generari accidit, quod ipsum inprimis, praeter eximias et praesentissimas facultates, pretium eius extollit, ut in ditiorum duntaxat et principum Nigritarum manibus versetur, qui illum sphaeris aureis argenteisve armari curant, adnexa ex eodem metallo catenula, cuius adminiculo tractari valeat: usus eius est, ut suspendatur per horas aliquot, vel. una alteraque vice agitetur in haustu aquae communis, quam, vix grani pondere imminutus, amarore imbuit: haustus, ita praeparatus, habetur summe cordialis et alexipharmacus, tum in ictero, febribus putridis, malignisque, et in quibuscumque viscerum obstructionibus medicamentum efficacissimum.